Queres

 

Queres que te bique

ou queres que che rife

vas andar así todo o día

rosmando detrás de min

loándome e queixándote

chorando e palmeando

deixa que chegue o día

sinalado

para que co ceo claro

che invoquen

o que temes e desexas

culpándome

han de vir con esas e

deixaralos correr

como corre o galo tras a galiña

levantados do poleiro

sen picar almorzo

buscarán restos na eira

ó amencer

e nós na cama sen durmir

sen querer levantármonos

sen poder bicármonos